معروف امریکی اداکارہ ہیڈن پینیٹیئر، جو ٹی وی سیریز ’’ہیروز‘‘ اور ’’نیش ول‘‘ میں اپنے یادگار کرداروں کی وجہ سے دنیا بھر میں مقبول تھیں، 36 برس کی عمر میں انتقال کر گئیں۔ ان کی موت کی خبر اتوار کے روز ان کے نمائندے نے امریکی نیوز چینلز کو دی۔
ہیڈن کے والد اسکِپ پینیٹیئر نے بیٹی کی وفات پر گہرے دکھ کا اظہار کرتے ہوئے کہا کہ ’’ہیڈن ایک روشن اور بے مثال شخصیت تھیں، جنہوں نے اپنے قریبی پیاروں کے ساتھ ساتھ لاکھوں مداحوں کی زندگیوں میں بھی بے پناہ محبت اور خوشیاں بکھیریں۔‘‘ انہوں نے مداحوں اور میڈیا سے اپیل کی کہ اس مشکل وقت میں خاندان کی پرائیویسی کا احترام کیا جائے تاکہ وہ اس ناقابلِ تصور صدمے سے نمٹ سکیں۔
ہیڈن پینیٹیئر کی موت کے حتمی اسباب تاحال سامنے نہیں آئے۔ ان کی ترجمان کے مطابق معاملے کی تحقیقات جاری ہیں، تاہم موت کی نوعیت سے متعلق مزید تفصیلات ابھی جاری نہیں کی گئیں۔ خیال رہے کہ ان کی وفات ان کی 37ویں سالگرہ سے صرف چند روز قبل ہوئی۔
ہیڈن پینیٹیئر نے اداکاری کا آغاز نہایت کم عمری میں کیا، صرف 11 ماہ کی عمر میں انہوں نے پہلا ٹی وی اشتہار کیا۔ چار برس کی عمر میں وہ مقبول امریکی سوپ اوپیرا ’’ون لائف ٹو لِو‘‘ اور ’’گائیڈنگ لائٹ‘‘ میں نظر آئیں۔ بعد ازاں انہوں نے فلم ’’ریممبر دی ٹائٹنز‘‘ اور اینیمیٹڈ فلم ’’اے بگز لائف‘‘ میں بھی کام کیا۔
ہیڈن پینیٹیئر کو سب سے زیادہ پہچان امریکی سائنس فکشن سیریز ’’ہیروز‘‘ میں غیر معمولی شفا بخش صلاحیتوں کی حامل چیئر لیڈر کلیئر بینیٹ کے کردار سے ملی، جو 2000ء کی دہائی کے آخر میں انتہائی مقبول ہوئی۔ اس کے بعد انہوں نے میوزیکل ڈرامہ سیریز ’’نیش ول‘‘ میں نوجوان کنٹری میوزک اسٹار جولیئٹ بارنز کا کردار ادا کیا، جس نے انہیں مزید شہرت دی۔ اداکارہ ہارر فرنچائز ’’اسکریم‘‘ کی دو فلموں ’’اسکریم 4‘‘ اور ’’اسکریم 6‘‘ میں کربی ریڈ کے کردار میں بھی نظر آئیں، جبکہ فلم ’’آئی لَو یو، بیتھ کوپر‘‘ اور 2011ء کی ٹیلی فلم ’’امانڈا ناکس‘‘ میں مرکزی کردار بھی نبھایا۔
ہیڈن پینیٹیئر اپنی زندگی کی مشکلات پر ہمیشہ بےباکی سے بات کرتی رہیں۔ رواں سال انہوں نے پوسٹ پارٹم ڈپریشن اور نشے کی لت جیسے مسائل کے بارے میں کھل کر گفتگو کی تھی، جن کے باعث انہیں 2018ء میں اپنی بیٹی کی کسٹڈی سے دستبردار ہونا پڑا تھا۔ 2023ء میں ان کے چھوٹے بھائی، اداکار جانسن پینیٹیئر، کی غیر متوقع طور پر دل کے موروثی عارضے کے باعث وفات ہو گئی تھی، جس کا ذکر انہوں نے بعد میں ایک انٹرویو میں انتہائی جذباتی انداز میں کیا تھا۔